2017年9月14日 星期四

營養師Gloria 於新假期的訪問:

【食是食非 】連鎖咖啡店卡路里!Pacific Coffee、 Starbucks卡路里 18款逐件數! | Food Wiki |


【食是食非 】17款食物 茶記卡路里 倒數! 10大低卡之選 + 7款高危碟頭飯 | Food Wiki |


【食是食非】 薯片卡路里 ! 20款常見款式 ~ 營養師推介+選購貼士 | Food Wiki |


【食是食非】10 款 人氣 甜品卡路里 排行榜~ 甜品吃多生暗瘡!|Food Wiki|


【食是食非】10 款 夏日 飲品卡路里 排行榜!珍珠奶茶最高!|Food Wiki|


【食是食非】水腫元凶! 10大 高鈉 食物! 1碗烏冬就中招! |Food Wiki|


【食是食非】 即食麵卡路里 ! 14款超巿常見款式 +營養師拆解3大迷思|Food Wiki|


【食是食非】8款 港式甜品卡路里 ~ 豆腐花低卡! 榴槤班戟~ 吃後要跑半小時|Food Wiki|


【食是食非】超市 零食卡路里!紫菜低卡~吃餅乾都好肥 |Food Wiki|


【食是食非】瞓唔着要食~ 8款改善 失眠食物 ! |Food Wiki|


【食是食非】 車仔麵卡路里!豬皮、雞翼、雞腳最肥? |Food Wiki|


【食是食非】 10大 通便食物 ~ 食芝麻糊、薏米水都有效!綠茶溝益力多 都可通宿便?!|Food Wiki|


【食是食非】食咩會醒啲? 9種 聰明食物 ~ 牛油果、三文魚令人轉數快|Food Wiki|


【食是食非】食豬腸粉想瞓覺? 8大吃完 眼瞓食物 ! 果汁、麥包都中招|Food Wiki|


【食是食非】好易肥!!10款~空肚不能吃的 早餐 |Food Wiki|


【食是食非】食花生最開心?13種「 開心食物 」大揭秘 |Food Wiki|


【食是食非】 腐竹、豆卜、魚腐勁肥! 米線 配料kcal 全公開|Food Wiki|


【食是食非】 Matcha Latte 肥過朱奶!! 暖胃變增肥.. 冬日 熱飲 kcal 排行榜 |Food Wiki|


【食是食非】肥牛不是最肥!? 火鍋料 卡路里排行榜!! |FOOD WIKI|


【食是食非】糖是美肌殺手!? 4大 糖的壞處 你要知!|FOOD WIKI|












2016年10月9日 星期日

《健康早餐- 芝士疏乎厘鬆餅 (ricotta soufflé pancake)》


一放假我就會「手痕」,忍唔住煮嘢食,悠閑地喺廚房一邊煮嘢食一邊聽歌,真係好寫意!

上星期我整咗芝士疏乎厘鬆餅 (ricotta soufflé pancake),媽咪食完話唔夠喉,今日要anchor! 鬆餅香甜鬆軟,極具空氣感,食落好似一陣風咁!配埋低糖楓糖漿,簡直係一個good good good good good morning!

整鬆餅漿好簡單好快,但煎時好考功夫,不過呢~見到製成品就好有成功感!食好野當然要花多啲功夫架啦,係咪?!咁好食嘅鬆餅,仲要比街外嘅鬆餅含更多蛋白質更低脂更低糖,你仲唔快啲試吓?

材料:(6-8件,3人份)
芝士(ricotta cheese) 130克

脫脂奶 90毫升
蛋黃  2隻
蛋白  4隻
低筋麵粉   60克
泡打粉   1茶匙
鹽   ¼茶匙
無糖楓糖漿   6湯匙
無鹽牛油/植物油  6茶匙

做法:

1. 將雞蛋和蛋白分別放入兩個大盤中。

2. 在雞蛋黃的大盤中,加入芝士攪拌,再加入鮮奶攪拌均勻。

3. 篩入麵粉、鹽和泡打粉,拌至沒有粉粒,成蛋黃漿。


3. 在裝蛋白的大盤中,用攪拌器打發蛋白至硬性發泡。(把盤倒轉,蛋白也不會掉下來)



4. 分兩次把蛋白和蛋黃醬拌勻,成薄餅漿。

5. 先在蛋糕模內塗上一層薄薄的油。

6. 燒熱易潔鑊,加入牛油,將蛋糕模放在易潔鑊上。將粉漿倒入蛋糕模中至五成滿,轉細火,開細火煎約兩至三分鐘。熄火,不要開蓋,焗三分鐘至鬆餅表面變色。


7. 脫去蛋糕模,將鬆餅反轉,煎至金黃色,上碟。

8. 食用時淋上無糖楓糖漿,即可享用!



煮食小貼士:
1. 如果屋企無蛋糕模,可以直接唔用蛋糕模,倒鬆餅漿到易潔鑊去煎,不過一定唔會咁厚架啦!
2. 如果屋企嘅平底鑊容易黏底,可以在蛋糕模下鋪上一張焗爐紙,之後再倒鬆餅漿到平底鑊去煎。呢個做法仲可以用少啲油去煎添!

份量換算:(每份,約兩件)
296kcal
(1份五穀 + 1份奶類 + 1份蛋白質+ 2份脂肪)

2016年10月6日 星期四

《減肥都可以食河粉!》



河粉滑嘟嘟,我自細都鍾意食「魚蛋河」,係做咗營養師之後,先慢慢改口叫「魚蛋米」。

點解要改口?因為怕肥囉!傳統粉麵舖賣嘅中式河粉都撈咗油,免得河粉黏埋一舊舊。所以傳統粵式粉面舖或茶餐廳嘅河粉都比較油膩,一碗河粉嘅熱量比一碗米粉差唔多高50%!

但有個好消息俾河粉fans!其實越南餐廳嘅河粉無撈油架,佢哋本身非常乾身唔油膩(睇圖),仲一樣咁滑添!所以減磅朋友都可以食雞絲或生牛肉河粉㗎!又或者可以去超級市場買乾河粉返屋企煮!


正宗越式河粉質感軟滑,帶少少煙韌,加埋越式香料同牛肉,嗯~ I love it! 

在超市或泰國/越南食品售賣店都有得賣。

傳統粉麵舖賣嘅中式河粉都撈咗油,免得河粉黏埋一舊舊。



壽桃牌河粉油份唔高,不過味粉中有好高鈉質和添加劑,大家唔好飲晒啲湯呀!

2016年10月2日 星期日

《美顏甜品- 北海道牛乳燉桃膠》

最近轉季,天氣開始乾燥,大家有冇覺得皮膚開始繃緊?我今日煮咗桃膠糖水滋潤一下,等我分享食譜俾大家啦!桃膠口感煙韌滑溜,配上北海道低脂牛乳,呢個甜品一試就愛上!

至於營養方面,核膠被譽為平價燕窩,含植物性蛋白質,有助身體製造骨膠原,修護皮膚和保持彈性。呢個甜品亦可以補充身體水份,保持皮膚滋潤。

當然啦,要滋潤皮膚,大家同時要記住每日要飲8至10杯水、食木瓜、奇異果等含豐富維他命A、C、E的水果呀!




材料(4人份量)
雪耳 1/2 個 (10克)
膠 10克
紅棗 35 克
乾蓮子 50克
冰糖 30克
(或甜菊糖 3-4茶匙)
脫脂奶 500 毫升
清水 1 碗

做法:
1. 桃膠用水浸發一晚。之後洗淨,備用。
2. 雪耳用水浸發致軟身。瀝乾。
3. 紅棗洗淨去核。
4. 乾蓮子浸發致軟身。瀝乾。
5. 把所有材料放入燉盅內,加入脫脂奶及冰糖。
6. 大火燉15分鐘後轉小火燉45分鐘。

份量換算:
a)(每份)(如使用冰糖): 161 kcal
1 份五穀 + 0.5 份奶類 + 1 份蔬菜


b)(每份)(如使用甜菊糖): 130kcal
0.5 份五穀 + 0.5 份奶類 + 1 份蔬菜

2016年9月27日 星期二



馬莎又出咗新零食!😋今次出咗風乾蘋果片,如果你哋鍾意食脆口零食,不妨考慮下!而且當中成份只有蘋果和濃縮檸檬汁,冇任何其他添加劑!熱量相等於1個大蘋果,有104kcal,仲有3克纖維咁多添 !

至於鍾意鹹味零食嘅朋友,可以考慮其他低卡嘅薯片。今個星期日行中環時,發現買一送一!平均$6包咋!我呢個師奶仔梗係買返幾包啦😜

不過大家記住唔好買錯,唔係款款都低卡,係我介紹過嘅先至低卡低脂咋!

之前介紹薯片的文章:

2016年9月26日 星期一

《美顏抗衰老蔬菜汁》


Lunch出街食飯,食唔夠蔬菜水果?

如果返工期間攞住紅蘿蔔條同橙食,怕會整污糟隻手?怕會惹來同事側目,以為你好得閒?

如果你有以上煩惱,不妨考慮前一晚將蔬菜同水果打成汁,第二日帶返公司飲。攜帶同飲用都好方便㗎!咁就無論你返工期間有幾忙,都可以飲嚟補充蔬菜同水果份量啦!

我尋日就將一條紅蘿蔔、一個香橙、¼個牛油果攪拌成smoothie,帶返公司作為下午茶。當中有齊美顏營養素維他命A、C、E,有助抗氧化和增強免疫力!而將三種食物加埋一齊,仲會產生更強嘅效用添!

除此之外,當中有豐富果糖和纖維,令我血糖平穩。所以即使我尋晚見客見到九點半,個人都依然好精神呀!你都不妨試吓啦!

份量換算:一份蔬菜+兩份水果+一份脂肪

2016年9月21日 星期三

《美顏食譜- 牛油果香橙沙律》

大家中秋節有冇食到「飽飽滯滯」呢?想減磅消滯,大家需要食充足蔬菜水果同飲水,去促進腸道蠕動,排走便便。所以呢兩日我都食沙律做午餐,感覺好清新醒神!

等我介紹一對美顏瘦身好拍檔俾大家- 牛油果加香橙!因為香橙很豐富維他命C,有助牛油果的維他命E發揮更強的抗氧化功用!有助美白抗皺美肌!我亦用咗檸檬同蜂蜜做醬汁,所以感覺更fresh更滋潤!



材料(1人份量):
青瓜1條
沙律菜 2碗
粟米 1盒
香橙 1 個
牛油果 1/4個

蛋白質可選:
烚雞蛋2隻或 一罐細水浸吞拿魚(95克)

醬汁:
檸檬汁 2-3匙(隨自己喜愛調味)
檸檬皮 1/2 茶匙
蜜糖 1.5茶匙

做法:
1. 青瓜洗淨,切粒。
2. 粟米瀝去水份。
3. 香橙去皮切塊。
4. 在碟中鋪上沙律菜,加上青瓜、粟米、牛油果和香橙。加入自己喜愛的蛋白質(蛋或吞拿魚)
5. 將醬汁材料拌勻,淋在沙律上。

對換份量: 3份五穀+ 2份蛋白質+ 1 份蔬菜 + 2份水果+ 1份脂肪