《低卡美顏甜品 -無花果北海道牛乳布甸 》

最近新鮮無花果當造，大家有無食丫？一粒無花果只有47kcal，味道清甜，賣相討好，營養值爆燈，最近成功俘虜咗好多減磅朋友！

你唔好睇佢細細粒，一粒已經有2克纖維，可以媲美一個細蘋果。鉀質仲好豐富，可以幫大家減輕水腫添！

最最最重要嘅係，紫色嘅無花果有非常豐富嘅抗氧化營養素，包括葉黃素、花青素、胡蘿蔔素。佢哋係保持眼睛健康和延緩衰老嘅好幫手！

我今次用清甜嘅無花果，配以滑溜香濃嘅北海道牛乳布甸。這道甜品最適合做飯後甜品，因為牛奶中的色胺酸和鈣有助減壓安睡，而無花果則舒緩眼睛疲勞，為你疲倦嘅一日畫上完美嘅句號！

材料（3杯）：
低脂忌廉100毫升
低脂北海道牛乳350毫升
糖25克 (或甜菊糖 6茶匙)
天然雲呢拿油 1茶匙
魚膠片3片(共7.5克)
無花果 2粒

做法：
1.在鍋中加入低脂忌廉、低脂北海道牛乳、雲呢拿油和糖，用細火輕微煮滾，攪拌至糖溶化，熄火。

2.將魚膠片浸在室溫水約一分鐘，變軟後瀝乾，放進鍋中的牛乳，攪拌至溶化，放涼。倒入容器中，放入雪櫃雪藏至少兩小時至凝固。

3.將無花果洗淨，抹乾。切出三塊無花果，將餘下的無花果刮出果肉。

4.取出已凝固的牛奶布甸，放上無花果果肉和無花果塊，即可享用。

份量換算：
a)（每份）(如使用砂糖): 144kcal
0.5份五穀 + 1份奶類 + 1 份水果

b)（每份）(如使用甜菊糖): 110kcal
1份奶類 + 1 份水果