《一份朱古力味雞蛋仔 熱量相等於2個漢堡包》

嘩好開心呀！因為我發現咗遠近馳名嘅「媽咪雞蛋仔」喺我尖沙咀公司附近開咗新分店！我以前成日都想特登搭車去紅磡買嚟試吓有幾好食，而家咁近就食到，太好了! 其實雞蛋仔係我既童年回憶，因為每個星期五晚飯過後，爸B就會帶我去買一底，一人一粒咁食，好溫馨㗎！所以細個咪咁肥囉！

大個咗之後先發現，原來每底原味雞蛋仔成390千卡，相等於一個半漢堡包既熱量。如果以一個55公斤既成年人去計算，即係要好盡力好快咁踩單車，踩至少1個鐘頭，先可以消耗到咁多卡路里！
如果好似我咁買咗朱古力味，咁就仲高熱量！保守估計，佢大約加多20克牛奶朱古力，即係大約109千卡！咁即係總共499千卡，約2個漢堡包既熱量喇！

所以⋯有時童年回憶呢啲嘢，偶然懷緬得架啦，唔使成日食！仲有，買咗記住同人分享，獨食「易」肥呀！