《美肌瘦身去腫水果 - 牛油果》

最近開始轉季，而且成日唔夠瞓，搞到皮膚好乾。為咗補救，呢幾日我不停食美顏水果- 牛油果！可能心理作用，食咗幾日，皮膚真係無咁乾！

牛油果雖然比一般水果含有較高脂肪，但大部份都係不飽和脂肪，有益心臟健康和滋潤肌膚。牛油果同時擁有抗氧化維他命C和E，可以有效抵抗自由基對皮膚細胞的侵襲，延緩衰老。當中豐富嘅鉀質更有助去水腫添！

牛油果纖維非常高，1/4個已經提供多於1個細蘋果嘅纖維。牛油果含較多脂肪，食完有助飽肚感更持久，減少食零食嘅慾望。

但大家要小心，牛油果熱量唔低，所以千祈唔好食過量！每30克牛油果（約1/4個細）個已經有53kcal。要食得唔肥，記得將1/4個換算為餐單內嘅一份脂肪或者一份水果，咁就可以美肌，又可以減肥啦！

但每次食¼個牛油果，剩低嘅點算？你可以考慮好似我咁，將佢變成雞蛋牛油果醬，朝早搽麵包食；又或者攪拌成綠茶牛油果奶昔，作為下午茶或宵夜。兩樣都可以放雪櫃保存兩日，咁好快就食完一個牛油果啦！快啲㩒入去睇食譜啦！

如果你個牛油果大細大約係iPhone 6 嘅三分之二，咁你食¼個就為之一份水果或脂肪。食珍寶牛油果就當然係1/6個為之一份啦！




《高蛋白質牛油果醬》
將1/4個牛油果和一隻雞蛋切粒，再加一湯匙低脂蛋黃醬拌勻，塗上麵包，即刻成為一個完美嘅豐富早餐！


《超強抗氧化奶昔》
將一至兩湯匙綠茶粉、1/4個牛油果、一杯脫脂奶放入攪拌器拌勻。可以加1茶匙蜜糖或者甜菊糖調味。