營養師為你逐一解構台式飲品! (附卡路里)

減肥都可以飲台式飲品? 當然可以! 從份量、飲品、配料到糖份，等我為大家遂一解釋點揀至「營」飲品! 揀錯咗嘅話，分分鐘飲一杯等於食咗三碗「飯」！  

1. 份量

為咗大家可以攞到最準確嘅資料，我特登喺澳洲貢茶買咗三杯唔同份量嘅貢茶，量度一下每杯嘅容量。

結果：

細杯- 450毫升

熱飲- 450毫升 (香港正常份量: 約500cc)

大杯- 750毫升（香港正常份量: 約700cc）

2. 飲品

每杯台式飲品（全糖）原來至少都等於半碗飯嘅熱量！如果係有奶類，因為通常用奶精沖製，所以飽和脂肪和熱量都比較高。

以下圖片係每一大杯（700毫升）貢茶特飲（全糖）嘅熱量和其熱量相當於嘅白飯份量。呢個係我根據貢茶喺澳洲嘅營養標籤，計算所得嘅資料。你快啲下載圖片，咁就可以落柯打前「停一停、諗一諗」，諗下飲杯飲品等於飲咗幾碗「飯」！

3. 配料

綠色= 有營之選        

有營之選1- 仙草(<35kcal/份)

即係涼粉，大部份都係水份，所以熱量很低，但纖維量唔高。

有營之選2- 寒天/愛玉/三色蒟蒻/蘆薈(<70kcal/份)

當中大部份都係食用纖維，所以身體吸收唔到，熱量較低。仲可以令你飲完有啲飽，食少啲其他小食添！不過有啲台式飲品店會加咗少少糖水去煮，所以點都仲有少少熱量。

最高熱量 - 珍珠 (~150-200kcal/份)

「珍珠」用薯粉製成，含非常高澱粉質，仲會用大量糖漿去煮，所以熱量非常高！以1杯700cc飲品內的珍珠量為例，熱量約相當於一碗白飯！

4. 糖份

唔好諗住黑糖姜茶或純茶清清地，就以為好健康，當中(700毫升)分別有大約14粒和9粒方糖，已經遠遠超出成年人每日建議攝取上限！所以叫少甜比較好，最好就好似我咁，叫走甜之後再加代糖啦！

不過大家要小心，有幾款飲品本身沖調配方已經有糖漿，叫咗走糖都仲係有一定嘅糖份。例如黑糖薑茶、水果茶、沙冰、多多優格等等。所以最好請教店員你所選嘅飲品本身有冇用到糖漿。

我嘅最愛(唔係最健康哈哈)

1. 寒天愛玉（走甜）

飽肚之選！我銀針測試過走甜嘅寒天愛玉都仲有少少甜，應該係因為加咗檸檬糖漿，但一杯應該少於100卡路里！

2. 奶蓋茶加寒天（走甜）

因為奶泡係用忌廉、糖、全脂奶沖製而成，會含較多飽和脂肪，高膽固醇嘅朋友就最好飲番清茶啦！不過我恃住自己平時食得健康，而且大拿拿擺差唔多$33（香港平過澳洲）買杯清茶真係覺得好唔抵，我夠識得沖清茶囉！所以都係選擇加奶蓋和寒天，咁樣心理會平衡啲哈哈哈哈。每份奶泡粗略估計都係約70卡路里姐～