Detox water 補充水份營養好幫手

什麼是「排毒」?係咪要飲「排毒水」先可以排毒?

大家都成日話「排毒」,究竟係乜嘢嚟呢?「毒素」其實係指因紫外線、自由基、壓力和食用過多化學加工食物等對細胞造成傷害,因而產生嘅廢物。不過其實身體有一套非常強勁嘅排毒系統,包括肝臟、腎臟、腸臟和皮膚,可以幫身體將「毒素」清除。所以身體運作正常嘅話,「毒素」並唔會囤積喺身體內因而影響健康。

好多人誤會咗一定要飲用「排毒水」(Detox Water)先可以「排毒」。其實「排毒水」(Detox Water)即係將新鮮蔬果和香草浸泡嘅有味水。只不過如果因為飲用天然嘅蔬果水,因而食少咗化學加工零食和飲少咗充滿添加劑及防腐劑嘅汽水或有糖飲品,令身體排毒系統可以休息下,唔使日日OT,幫你清走毒素姐!比著係你,日日OT仲要冇得抖,你都想辭職唔做啦,係咪先!?相反,因為飲「排毒水」從而食多咗蔬果,吸收多咗維他命和礦物質,就好似請咗個「得力助手」,有助排毒系統輕鬆運作。


Detox Water有咩好處?適合什麼人飲用?

Detox Water有助補充水份和水溶性營養素,而且工序簡單,所以啱晒忙碌嘅上班一族。 如果你唔鍾意齋飲水咁寡,不如考慮下detox water啦!因為蔬果可以增添水嘅味道,飲落無咁「悶」,飲detox water一定比飲汽水或咖啡好!而且多飲水有助帶走毒素,從而滋潤皮膚,變得更有光澤! 雖然食用整個水果時所吸收嘅營養係最完整,不過好多OL返工都唔方便食水果,又可能怕整污糟隻手同枱面,結果好多時都食唔到每日建議嘅水果份量。而detox water 內嘅水果因為已經切到細細粒,所以唔會有以上煩惱。

而且水果浸泡在水裏面,可以令部份水溶性嘅維他命C同鉀質會流入水中。維他命C有助增強免疫力,亦有美白抗皺嘅作用;而鉀質則有助平衡身體過多嘅鹽分,能減少因攝取過多鹽份所引致嘅水腫,特別適合經常要出街食飯應酬嘅朋友。

想更有效地排走毒素,就要記得食埋入面水果肉先至更有效啦!因為非水溶性纖維會留係水果肉裏面,並唔會流到水中,而非水溶性纖維可以促進腸道蠕動,從而排走便便。水果肉內仲有好多抗氧化營養素和非水溶性嘅營養素,有助抵抗自由基。所以記住唔好淨係飲detox water,而要將切粒嘅水果都食埋喇!

對日常少飲水或少食生果嘅朋友,飲用detox water就可以補充水份和水溶性營養素。不過如果你本來已經每日食2碗菜、食2個水果、仲飲多過8杯水,咁就唔駛特別自製detox water啦。仲有仲有,雖然鉀質有助去水腫,但患有腎病及腎衰竭嘅朋友身體有可能唔可以有效排走鉀質,所以要問返自己嘅醫生或營養師先至決定飲唔飲得啦! 有糖尿病或胃酸過多嘅朋友都要小心選擇水果啊!

簡單快捷detox water做法:
將新鮮蔬果和香草配搭好,清洗切粒,加入水樽,放進裝有飲用水的水瓶,蓋上蓋搖一搖,直接飲用又得,或者放入雪櫃冷藏至水果出味後先飲又得 ~



Detox water 1藍莓半碗、草莓1碗、薄荷葉6片、椰子水2

作用椰子水含鉀、電解質和抗氧化營養素,特別適合要戶外工作嘅朋友。而士多啤梨嘅「花色苷」和藍莓嘅「花青素」則可以幫助皮膚抗老抗皺。呢杯特飲已經可以滿足成人每天需要維生素C,有助骨膠原組成,維持皮膚彈性,仲有美白淡班嘅作用添!



Detox water 2: 香橙半個、青檸3片、檸檬3片、青瓜3片、薄荷葉6片、飲用水2

作用:  青檸、香橙和檸檬含豐富維他命C,可增強免疫力,加速感冒復原時間。加埋薄荷葉和青瓜,味道清新,飲完個人都精神啲!



溫馨小提示:
1. 包含果皮嘅水果,如香橙、青檸或檸檬,記住要先用抹布徹底將果皮洗乾淨,或將整個皮去掉。

2. 連皮進食嘅水果,如藍莓和草莓,要先以鹽水浸5-10分鐘,再用清水沖洗。


3. 製作好嘅「排毒水」必須於一至兩天內飲用,因為長期重複浸泡會令生果腐爛,有可能引致肚瀉架!而且放得越耐,生果嘅維他命C就越流失得多,營養價值越低。

留言

熱門文章