《破解對微波爐的四大謬誤》


使用微波爐加熱食物會致癌?食物結構會因而被「改造」,多食無益?
其實微波爐係每個澳洲家庭必不可少嘅煮食工具。而家喺醫院返工,我哋成班營養師都係用微波爐翻熱飯盒架。如果真係對身體有害,我哋又點會搵自己笨?
網上有關微波爐冇根據嘅謬誤有好多,快啲睇下有科學根據嘅事實係點喇!


謬誤一:微波爐加熱食物會致癌?

事實:微波能量被食物吸收後會轉化為熱力,唔會令食物帶有“放射性”或受“污染” 。 而且香港食物安全中心參考文獻,總結出經微波爐煮食嘅肉類,並唔會比使用傳統方法嘅肉類含較多致癌物質(包括雜環胺、多環芳香族碳氫化合物及亞硝胺 )。


謬誤二: 用傳統水煮嘅方法會比微波爐烹煮嘅食物有益。


事實:「美國食物及藥物管理局」指出以微波爐烹煮嘅食物可能保存更多維他命和礦物質。 有研究比較過用微波爐和傳統用水煮嘅七種蔬菜,發現用微波爐烹煮嘅椰菜花、菠菜和青豆,比起用水煮嘅蔬菜更能保存其中營養素。

最主要原因係微波爐嘅效能比較高,所以煮食時間較短。而且用嘅水份較少,所以會有較少嘅水溶性營養素流失到水裏面。 
香港食物安全中心參考文獻指出,比較經傳統烹調方法和微波爐煮食過嘅食物,當中嘅蛋白質和脂肪並無大分別。


謬誤三:當微波爐運作時,會發出對人體「有害」嘅輻射。

事實:正常嚟講,市面上所有嘅微波爐都經過安全測試先可以在市面出售。而「美國癌症社團」(American Cancer Society)指出,運作中嘅微波爐流出嘅微波能量絕對遠遠低於對人體有害嘅程度。 
當然如果微波爐爐門不能緊閉或損壞,咁有可能會有少少流失。安全起見,最好當微波爐運作時,與微波爐保持至少一隻手位嘅距離。 


謬誤四:經微波爐烹煮嘅食物會在結構上被「改造」,進食後對人體有害。

事實:經任何烹煮方法處理嘅食物,味道和結構上都會和生嘅食物有少少分別。只不過係微波能量和傳統方法嘅傳熱效能唔一樣,所以煮出來嘅效果可能有分別,正如煮牛扒時,用水烚和用油煎出嚟嘅效果都唔一樣。
但並唔代表經微波爐烹煮嘅食物對身體有害。而微波能量中嘅分子(photon)好細,根本唔足以將食物嘅結構完全改變。


睇完各大機構嘅講法,大家就可以安心使用微波爐啦!我自己日日都用,可以縮短煮食時間,既方便又快捷!

留言

熱門文章