《10分鐘 + 3種材料搞掂！香辣茄汁鯖魚意粉》

減肥初期，好多人就咁喺屋企煮個米粉就算數，最多加啲蟹柳、魚旦、火腿。其實精製肉類唔係唔食得，不過鹽分又高添加劑又多，最好一個星期唔好食多過四次。長期咁食落去，因為營養價值唔高，皮膚會乾燥暗啞㗎！再者，咁食都未免太寡太悶姐！

其實想方便，可以考慮多啲高營養價值嘅罐頭食材，好似罐頭吞拿魚、鯖魚、沙甸魚、三文魚丫！呢啲魚含有豐富奧米加三脂肪酸，有助滋潤皮膚、減壓、護心。

我今次買咗香辣茄汁鯖魚，加埋車厘茄同意粉，10分鐘就煮好晚餐喇！低脂低糖又好味！連鹽分都唔高！所以話，想減肥護膚，都可以好簡單好好味！

材料：
罐頭香辣茄汁鯖魚 125克（1罐）
意粉 60克
車厘茄 250克（1盒）/ 番茄（中）2個

做法:

1. 在一大鍋中加入水和意粉，煮至八成熟。
2. 在煮意粉同時，將車厘茄切半。
3. 燒熱易潔鑊，加入車厘茄和罐頭鯖魚，加入1/3碗熱水，慢火煮至軟身，約3分鐘。
4. 意粉直接加入易潔鑊中炒勻，即成 。

煮食小貼士:
1. 罐頭魚已經調好味道，唔需要再額外落鹽啦！呢道意粉嘅鹽分只有553毫克，低於一餐鹽分攝取上限（667毫克）。如果想再再再低鹽啲，就唔好落晒啲茄汁，咁就無咁易水腫啦！
2. 想再食辣啲， 可以加啲乾身辣椒片！

熱量：466kcal (3份五穀類+3份蛋白質類+ 1份脂肪類+1份蔬菜類）