《三大降膽固醇食物》


要降膽固醇,大家成日講「唔好食呢樣唔好食嗰樣」。其實唔止係要避開高飽和脂肪同反式脂肪嘅食物(牛油、肥肉、炸雞),更重要嘅係主動地食多啲「降膽固醇食物」。
等我介紹三大類別「降膽固醇食物」俾大家啦!各自嘅原理功用都唔一樣,唔可以取代對方㗎!
1. 水溶性纖維
「食麥皮可以降膽固醇」,大家睇電視都應該有睇過啦!但原來一日要食到9平湯匙燕麥,先可以達到每日3克水溶性纖維嘅建議份量!所以除咗燕麥,仲可以考慮乾豆(紅腰豆、紅豆)、蔬菜(秋葵、木耳)、水果(蘋果、熱情果)!
2. 植物固醇
可能聽落有啲陌生,等我解釋一下。植物固醇係植物嘅天然物質。佢化學結構同膽固醇好相似,所以同膽固醇食物一同進食時,可以阻隔膽固醇喺腸道內吸收,繼而降低血液中壞膽固醇水平。 
歐盟、澳洲心臟基金會、美國心臟協會等團體都建議,膽固醇偏高人士若每日攝取約2克植物固醇,並持續3星期,同時配合均衡飲食及適量運動,有助降低壞膽固醇達7-10%。
植物固醇喺天然食物都可以搵到,包括大豆、果仁、豆類及穀類食物,不過含量非常低,食用大量先達到建議份量(一日2克)。所以要達到降膽固醇效果, 膽固醇偏高人士可以考慮每天進食添加咗植物固醇嘅食物,如
- 1支65毫升Benecol倍樂醇乳酪飲品(34卡,少於一茶匙人造糖)或
- 2-3 湯匙添加了植物固醇的植物牛油(多於200卡)或
- 2盒共500毫升添加了植物固醇嘅大豆飲品(230卡,5茶匙糖)。 
3. 不飽和脂肪
千祈唔好「滴油不沾」!每餐要有返一至兩茶匙健康油份,例如橄欖油、芥花籽油、葡萄籽油、牛油果、果仁等。當中嘅不飽和脂肪有助降低膽固醇。
有呢三種食物,再配合均衡飲食同適量運動,降膽固醇就話咁易啦!




留言

熱門文章