番薯早餐

星期六日食「放假餐」，星期一至五就食得健康啲。今朝我就食返番薯做早餐！最近紫薯好hit，因為鄭秀文話佢日日都食，可以養生養顏！

我就鍾意紫色同黃色一齊食，因為兩種功效唔同。黃色就多胡蘿蔔素，可以增強免疫力、預防夜盲症同平衡皮膚油脂分泌；紫色就多花青素，對維持視力、皮膚同血管彈性都非常重要！

其實兩隻熱量差唔多，而且都係高鉀質高纖維，可以幫助去水腫排毒。建議大家可以用光波爐焗，又或者隔水蒸，咁樣就最保存得到啲營養素！如果直接放落水煮，部份嘅鉀質同埋以上嘅抗氧化營養素都會流失㗎！