《食用紅米會傷肝傷肌肉？》

尋日有好多客WhatsApp我問，「紅米係咪唔食得？」謠言聲稱紅米會損害肝功能，令肝酵素上升同破壞肌肉組織。但其實謠言係將「紅麴米」誤認為「紅米」，而兩者係截然不同嘅食物！

重點：
1. 「紅麴米」係將紅麴菌放喺蒸熟嘅大米上發酵，唔會正常食用。「紅米」係天然嘅五穀物，佢嘅紅色主要來自抗氧化營養素花青素，有助心臟健康。

2. 「紅麴米」中有可能含有降膽固醇物質「他汀（Statin）」，但成份非常唔一致，所以成效成疑，暫時唔建議高膽固醇人士食用。「紅米」中有纖維可有助腸道和心臟健康。

3. 「紅麴米」係發酵過程有可能產生「橘黴素」，有可能引致腎衰竭。而且有些人會出現頭痛、肚脹、肌肉流失或肝功能受損嘅副作用。「紅米」係完全安全食用嘅高纖五穀類。

所以其實只係「紅麴米」被禁售，而唔係「紅米」！紅米含豐富的維他命B、鐵質、纖維素，係非常健康嘅食物，所以唔好再冤枉佢啦！

https://nccih.nih.gov/health/redyeastrice