《新年健康食譜- 紅棗糕》

今年屋企整紅棗糕，用咗成三大碗香甜嘅紅棗去整！食起嚟有好香紅棗味，口感煙韌，忍唔住食完一件又一件！😋😋😋
比起市面上嘅紅棗糕，我減少咗添加糖嘅份量。大家亦可以用甜菊糖去進一步減少糖分。而且自製紅棗糕會更真材實料！最近見到市面上有一啲紅棗糕，竟然落好少紅棗，再加老抽、色素同調味劑！😡😡😡
好易整㗎咋，廚房新手都會整到！食完紅棗糕，祝大家新一年大紅大紫，「紅」運當頭！

材料（約20件，1.5寸方塊）
紅棗 (連核計算) 300克
水 500-700毫升
木薯粉 200克
馬蹄粉 30克
糯米粉 30克
片糖 90克
（要因應紅棗的甜度而調整片糖份量。或可使用4-5湯匙甜菊糖代替片糖）

做法:

1. 紅棗洗淨，開邊去核。

2. 煲滾500 毫升水，把紅棗放水中煲爛。放入攪拌機打茸，用篩和湯匙壓出棗蓉。

3. 把棗蓉加水至700毫升放入煲內，加入片糖/甜菊糖用小火煮至糖完全溶化，放涼備用。
4. 木薯粉丶糯米粉及馬蹄粉放入一大碗中拌勻。倒入已放涼的棗蓉水，混合至沒有粉粒。過篩以確保沒有粉粒。

5. 在鑊中加入蒸架，加入水，煲滾。在蒸模內先掃一層薄薄的油，放入已煲滾水的鑊中。在模內，先倒入大約0.5 厘米厚的粉漿。加蓋大火隔水蒸5-6分鐘至已凝固及變色，再倒入另一層粉漿。重複此步驟至8成滿。
6. 最後就可以最用大火隔水蒸15分鐘，取出放涼，即成。

煮食小貼士 :
1. 粉漿會沉底，所以一定要每次都攪勻後，才倒入蒸模中。
2. 想節省功夫，可以考慮每次倒入更多的粉漿，那就可以蒸少一點層數。
3 要待紅棗糕完全涼透才脫模。切時一定要一刀過切，否則不美觀。
4. 想減省糖分，可使用甜菊糖，熱量減少24%！

每件熱量：75kcal （1份五穀）
(若使用甜菊糖： 57kcal)