《日本水蜜桃營養價值高 一日一個夠晒數》

好開心！我嘅女王大人從北海道搬咗一箱山梨縣水蜜桃返嚟！據說係咁多日本水蜜桃中甜度最高！一咬落去，啲汁就湧出嚟，真係好清新香甜！

水蜜桃仲要好有益添呀！當中有豐富嘅抗氧化營養素綠原酸、檞皮素、維他命C等等，有助保護皮膚年輕有光澤。唔只係咁，仲有研究指出，香桃可以降低患上高膽固醇同乳癌嘅風險添！

香桃肉質纖細，但原來一個已經有大約6克嘅食用纖維，可以滿足全日所需纖維嘅四分之一，有助「排清毒素身體好」！

不過呢，提提大家，所有食物食適量就足夠，唔係食得越多越好。你睇下，個水蜜桃比我嘅拳頭仲要大，一個差唔多成400克！而且日本水蜜桃嘅甜度可以達到16、17度，糖分當然唔少。一般來講，一個400克嘅水蜜桃有大約156卡路里，差唔多有7粒方糖，仲多過兩個橙！所以一日最多食一個好啦！