《智選至「營」海鮮 唔怕高膽固醇》

尋日有香港朋友到訪，緊係要帶佢地去悉尼魚市場食海鮮啦！

我買咗三文魚刺身、生蠔、老虎蝦同即開即食海膽。其中一個朋友見到買咁多海鮮，好訝異地問：「咁樣唔會好高膽固醇咩？」

我解釋:「其實大家成日以為食高膽固醇既食物，就會令血內膽固醇偏高，其實呢個概念係錯架！膽固醇八成係由肝臟製造出嚟，身體好聰明㗎，你偶然從食物中攝取多咗膽固醇，肝臟識得自動調節製造返少啲，以達致體內平衡！所以偶爾食多啲都唔驚！反而食咗高反式脂肪嘅食物如炸魚炸薯條和朱古力等；又或者高飽和脂肪或動物脂肪既食物如薄餅、牛油蛋糕、全脂雪糕等等，先會令身體製造過多膽固醇！」

朋友聽完，心虛咁話：「但我哋呢個trip已經食晒雪糕pizza同蛋糕，仲諗住陣間去Lindt cafe飲埋熱朱古力添！」

所以我成日都話，大家怪錯左啲健康既食物! 

要食得健康，其實可以好豐富！

就今次為例，我哋每人食咗3隻大蝦、4隻生蠔、1隻海膽、6片三文魚，都只係4份蛋白質，都未過300kcal！成年人每日大約需要4-7份蛋白質，咁食都未超標！

哈哈係咪好似帶子呢？佢係flat oyster 呀！生蠔含豐富既鋅質，對增強免疫力和男士生殖能力都有幫助！而且每80g（約3隻中特澳洲蠔）既膽固醇只有64mg，脂肪都只係1.6g。即係3隻蠔先等於一隻雞蛋份量的蛋白質，熱量嚟講「抵食」到不得了呀！加上價錢嚟講，澳洲生蠔都好「抵食」，一隻先至約港幣＄13！

我人生第一次即開即食海膽，估唔到咁鮮甜同幼滑，仲有好濃海水味！一隻港幣＄12咋！ 海膽既脂肪好低，每100g只有約一茶匙油，只係膽固醇較高，100g約有290mg膽固醇。但係一隻先得20-30g，所以食兩隻都唔駛怕啦！

仲有好肥美鮮甜既三文魚！當中含豐富奧米加三脂肪酸，可降低血液中既三酸甘油脂水平，保護心臟健康。每30g（約3-4片）含60 kcal，相等於一份蛋白質。

喺澳洲食海鮮，又點少得澳洲虎蝦呢！6只中蝦（80g）先等於一份蛋白質（60kcal），即係一隻雞蛋。我呢啲咁大隻，大約三隻為一份蛋白質啦！