第一位！？我冇眼花！？😍😍😍
真係誠品暢銷書榜-健康生活🎊第一位🎊！🎉🎉
第一眼見到，我真係有啲興奮到想飛起嘅感覺，簡直受寵若驚！呢兩日不斷聽到人話：「你第一次出書就上第一位，真好彩！」
好多人以為我事業一帆風順。但其實我想鼓勵所有追夢嘅人，我都受過挫折，曾經諗過放棄做營養師。
記得喺舊公司第一次做訪問時，我好緊張咁睇咗幾日資料，結果因為太平舖直敘去描述冬瓜嘅營養價值，捉唔到新聞重點，自此公司冇再俾機會我。
仲記得我寫過一篇文章，係公司嘅月刊講營養標籤。最後篇文俾上司改咗好多，公司就唔再要我去負責寫任何文章。
又記得以前老細鬧我詞不達意，話同我溝通唔到。我以為自己做唔到任何訪問同講座，更唔好諗出書。
我覺得同事A比我風趣，同事B比我有經驗，我呢？我以為我一世都唔會做一個好嘅營養師，但我真係好享受同啲客傾計嘅過程，見到啲客慢慢變健康我就好滿足。我唔想放棄。
為咗令自己變好，我去咗澳洲讀營養碩士。
唔識分析資料？我有半年喺間房度不停睇研究寫總結論文。
唔識捉新聞重點？我不停睇其他營養師寫嘅專欄報導，檢討自己不足之處。
講嘢詞不達意或者文筆差？我開始寫facebook，跌跌碰碰，慢慢摸索大家著意嘅重點。用最簡單貼地嘅方法去傳達營養知識。
依家回頭一望，原來冇必要去將自己同其他人比較，因為每一個營養師都有自己嘅風格。最緊要係個心，一顆真心真意想幫到人嘅心。
我想同大家分享嘅係，只要你自己堅持理想，繼續努力，你一定會有成功嘅一日。
其實我好感激舊公司。多得佢嘅鞭策，激勵我不斷去努力改善自己。最多謝嘅係佢教我唔好俾任何藉口自己，遇到問題，唔好去推卸責任，先諗清楚自己可以點去改善。
亦都要多謝而家公司嘅同事，一直俾我嘅自由度同信任。
我更感激大家，係大家陪着我成長。多謝大家inbox/留言俾我，見到大家真係實踐我嘅建議，我覺得自己做嘅嘢好有意義好滿足☺️☺️☺️我會繼續盡我所能，改進自己，務求繼續令大家愈食愈fit ！😊😊😊🎉🎉🎉
多謝多謝多謝你哋每一位，I am blessed!
Love you all ❤️ ❤️❤️❤️❤️❤️❤️❤️

留言

張貼留言

熱門文章