蒸海鮮火鍋

冬天想食得健康啲,大家可以考慮蒸海鮮火鍋啊!海鮮低脂高蛋白質,非常適合減磅朋友!母親大人一睇到阿拉斯加蟹做緊特價,就即刻掹咗我同屋企人去食蒸氣火鍋。等我同大家分享下點先食得健康呀!
1. 好多人都會蒸雞,雞肉(去皮)嘅脂肪好低。但蒸雞時雞皮嘅油會流入粥底,若粥底本身仲有排骨嘅話,脂肪就會非常高!所以唔好諗住食粥清清地就好健康呀!呢間餐廳係一開始準備咗生嘅白米同排骨係鍋底,我係煮海鮮前已經拎走晒啲排骨,只係剩低南瓜同白米,蒸煮時海鮮嘅鮮甜味流入粥底,結果粥嘅味道更香更清!
2. 小心食過量蛋白質!樣樣海鮮都咁鮮甜咁好味,仲要咁貴,叫咗返嚟好難唔食㗎喎!所以另外兩餐記住要留quota,咁夜晚先可以食得盡興啲!仲要記住嗌蔬菜同五穀,我就嗌左高纖嘅雜菌番薯粟米,咁先可以令自己飽肚啲嘛,仲可以令成張單平啲添!(哈哈尤其係當你係做埋單嗰個呀!)
蒸氣火鍋除咗低脂,重點係要等好耐先有得食,慢慢食就自然會令腦部接收到飽肚嘅訊息,自然會比打邊爐食得少啲啦!唯獨係有痛風嘅朋友就要小心啲,因為貝殼類嘅嘌呤都比較高,會容易引致痛風發作架!








留言

熱門文章