食代餐可以減肥?廣告/傳銷員成日都講代餐可以清腸胃,燒脂排毒(下略1000字)。究竟係咪真呢?
作為營養師,我對乜嘢減肥方法都好好奇,我都試過食代餐。
以前係澳洲時,成日出去食brunch食雪糕,肥咗幾磅。但真係開始頂唔順自己啲豬腩肉,就決定自己寫餐單俾自己,一日食足四餐,第一個星期減咗三磅。
第二個星期,我用咗千幾蚊買五日代餐。呢五日早午晚都要飲奶昔,其實飲完唔肚餓嘅,但又唔算飽。之後就食好多無調味嘅沙律菜去頂肚。餐與餐之間都有一份小食,所以個人都算精神。
食到第五日,為食嘅我已經好厭倦奶昔陣味,但駛咗咁多錢,唯有頂硬上。但結果只係輕咗一磅,嗰幾日見到個磅數輕得好少,個人超憫超唔開心。結果星期日食返egg Benedict 加三球雪糕補償自己,唔使問,梗係重返嗰一磅啦。
等我總結下我食代餐嘅經驗俾大家。
優點:
1. 方便,完全唔使諗食啲咩。
2. 某啲牌子營養價值唔低。至少比魚蛋米粉、火腿三文治好。
壞處:
1. 味道單一,只係食幾日已經食到好厭,好難持久地食幾個月。
2. 唔持久。原本嘅飲食習慣完全無改善過,食完代餐之後就會回復以前嘅飲食習慣,令磅數反彈。
3. 要閉關斷六親,拒絕應酬食代餐。
4. 有啲牌子嘅熱量太低,會令人覺得好肚餓。熱量太低更會令身體流失肌肉,減低新陳代謝,日後食返多少少,都會反彈得好快。
5. 唔符合個人飲食習慣同營養需要。試諗下,一個120磅嘅人同200磅嘅人,所需要嘅營養同熱量差距好大。又點會需要同一份代餐呢?
6. 貴。貴。貴。
有啲人覺得,食代餐嘅頭幾日減咗幾磅,以為好有效。我可以好肯定咁話你聽,你唔需要食代餐,只要好似我咁食低脂均衡嘅餐單,減少高脂高糖食物,你第一個星期會減走水份同脂肪,磅數一定有明顯分別,同代餐一樣咁有效。
而通常代餐都高纖維,可以幫你排毒(即係去便便),磅數自然會輕。但第二至三個星期開始,效果就會開始冇咁明顯,日後拉慢咗個新陳代謝,仲要容易反彈添!
所以與其駛咁多錢去買代餐,不如用啲錢買真正對身體有益嘅蔬菜水果,食得健康啲啦!咁多錢可以食到好多好好味嘅嘢食啦!飲食要多元化,食得飽,先至會令人開心精神啊!減肥無捷徑,想減得健康有營,只有腳踏實地地改善飲食習慣先係持久之道!





留言

熱門文章