見到本書喺書展出現，真係好興奮！過去一年努力籌備本書期間，我都有質疑過，究竟我嘅心思可唔可以透過文字去傳送俾大家？究竟大家會唔會因為我嘅用心而改變一點點生活習慣，變得更健康更開心？
我利用僅餘嘅午飯時間寫文睇研究、放假就不停地試菜寫食譜計熱量。老豆竟然問：「你咁博究竟值唔值得？我見書展＄88買4本食譜，無錢賺架喎！」我真係炆到想喊，由頭到尾我都冇諗過用本書嚟賺錢，賺得返買餸嘅材料費已經偷笑。
我只係想用我微小嘅力量去為呢個世界做出一點點嘅貢獻。我好唔想見到啲人為咗減磅而去絕食、 或者淨係食一啲低營養價值嘅魚蛋米火腿通，結果瘦係瘦到，但患上骨質疏鬆、貧血、皮膚枯黃等等。我好想大家減磅之餘，係真係食得健康有營。
多謝有啲讀者留言，話我聽本書真係可以令佢哋食得更健康、越食越瘦。無論係聽到你哋母親節有煮俾媽咪食，或者令你哋瘦咗幾磅，我已經好感動。最多謝係我班客，見證住你地跟住啲食譜煮，食住嚟瘦，仲要學我咁擺晒碟，真係笑鬼死我！你哋食得開心我就開心。多謝你們每一位嘅支持。我會繼續努力寫Facebook 同大家分享營養資訊架！
留言
張貼留言